Phungthlukbia

1. A bingtalet Cang-al thlor
Rian ningcang loin an ṭuan tikah an chim tawnmi a si.

2. A Buh ah Buh lawng, a Sa ah Sa lawng
Buh ngeih ah sa ngeih lo, sa ngeih ah buh ngeih lo, thil ngeih tikah a bawmtu a kepthuat thil dang an ngeih chih lo i an tlam a tlin lo tik ah an chim tawnmi a si.

3. A Buh ah Kawl Mum, a Meh ah cu bak
Mum hi buh caah a thaw ngaingai. Mumthau zuhui cu a dang zuhui nakin a thaw deuh fawn. Kan eimi buh le kan imehmi aa thleidang lo tiah a kemh an ngeih lo caan ah an chim tawnmi a si. A sullam cu ‘na ruahnak le ka ruahnak aa dang lo’ tinak a si.

4. A cawi bal lo Khuang cawi in
Mi pakhatkhat nih thil pakhat an tuah khawh tikah, keimah lawng a tuah khomi ka si ti phun in an iporhlaw theo. Cu tikah an chim tawnmi a si.

5. A ceih nih a ei tluk
Ei awk le cotin awk a um tikah kan ei kan cotin hlanin kan ceih ah kan tha a nuam ngai tawn. Cu bantukin a caan a phanh hlan ah kan ceih i kan inuamh hna khi an chim duhmi a si.

6. A cep na sol lai
Ralrinte in bia chim le rianṭuan izuam, na palh sual lai, ti duhnak a si.

7. A chim kho lal ṭhu
Mi sinah ralṭha in a chim ngammi nih minthang ah an cang kho tinak a si.

8. A dil na a sat na
Mi pakhat nih ṭhatnak a tuahmi kha a dang, pakhat nih a hrawhpiak lengmang tik i chim tawnmi a si.

9. A dotu hmasa rian lim
Thingthluan kan khanmi khi a tanglei in a dotu um ahcun a fek chinchin. Hawikom a ngeimi le rianṭuannak ah bawmhchantu hawikom le bochan awk a ngeimi cu an fek chinchin tinak a si.

10. A ee nih ee hna kaw; a hnawt nih hnawh
Mi pakhat nih thil ṭha lo a tuah tikah a dang pakhat nih a remhpiak tawnmi hna khi a chim duhmi a si.

11. A fir nih mi tei
Mifir le mi hrokhrol le mi holh kho nih teinak an co tikah an chimmi bia a si.

12. A firtu ningzak hlah; a hmutu ningzak
Mihrut le miṭhalo nih sualnak an tuah tikah ningzah an hngal lo. Mifim le miṭha nih an theih an hngalh tik ah an ning a zak tinak a si.

13. A hngal nih sa ei
Phun hnih in hman khawh a si. A kawlhawl a thiammi nih sa le chaw an hmuh khawh. Mi ninghngal ningzah a hngal lomi nih a ṭha deuh le a thaw deuh an co tinak a si.

14. A hrut nih a fim chim
Pakhatkhat nih palhnak an tuah i chimhhrin an duh tikah an lung nem seh tiah biahram dawmhnak ah an chim tawn. A hngal lomi nih an hngalh deuhmi chimh tinak a si.

15. A hrut nih hruh man cawi cawk lo; a fim nih fim man a ei cawk lo
Mihrutmi nih cun an hruh ruangah liampal tlak lo an liam tawn i mifimmi nih cun hmuhtin tlak lo zong an ihmuhtinter tawn. A fimmi cu a hrutmi nak in an khuasak a ṭha deuh tinak a si.