Chin Democracy and Human Rights Network Dirh A Si Cang

Chin Democracy and Human Rights Network Dirh A Si Cang

Chin Democracy and Human Rights Network cu September 21 ah committee ṭhate in dirh a si cang. Tawlreltu hna cu: Adviser ah Pu Khan En Thang, Executive Director ah John Smith Thang, Coordinator ah Robert le Ni Chum Er, Treasurer ah Pau Suan Khai hna hi an si. Hi bu hi Korea ram um Laimi nih an dirhmi a si i aa tinhmi cu a bu min zoh in hin a fiang ngai ko cang. Member zong an karh chin thluahmah ti thawng kan theih. Hi bu hi ram le miphun a dawtu pawl July thla, ni 6 ah khan meṭing an ṭhu i July 13 ni ah Kawl ralkap Palai zung hmai ah Salai Tin Maung Oo philhlonak ah tiin dohlanghnak zong a rak tuah bal cang.

Kawl ram ah Laimi hi Kawl ralkap cozah ruangah a si a fak bik le a ṭhangcho lo bik kan si. Kawl ralkap cozah nih kan miphun, kan holh le kan biaknak tiang in hloh a kan timh. Kawl ralkap nih Lainu an ṭhit hna ah cun an rian an kaiter colh hna. Kan Lainu pawl zong a phunphun in an lem hna i an tlaihhrem hna. Kawl ralkap lawng an si lo Kawl miphun hrimhrim nih hin Lai miphun hi hloh an kan timh. Lairam an um chung ah hin Lainu pawl hi an nupi ah an iser hna i an iṭhial lai ah cun an mak hna. Laimi nih kan izohchunhmi ngaknu pawl cu lakfak he bak an um ko. Zei tluk lungfak dah a si. Laimi cu miphun hme kan si bang in pakhat le pakhat hi kan kong kan ithei dih ngawt. Zei tluk in dah an ning a va zah lai.

Kan holh le kan ca zong nihin ni ah cun Sianginn zong ah cawnnak nawl an kan phih cang. Kawl ralkap cozah lawng si loin Kawl pawl tiang nih hin Laica kan rel khawh lo ahcun an inuam. Kan holh le kan ca tiang holh an kan timh cu lung a fak ko.

Cu lawng a si lo; kan biaknak tiang bak in hloh an kan timh. Biakinn saknak nawl tehna an kan pe lo. Lung a fak ko.

Ahodah kan rinh lai, kan ram thlennak ah? Kannih South Korea lei cu John Smith Thang a rak phan i Laimi vialte Kawl ralkap cozah doh ding ah kan tha a tho chinchin. Dohlanghnak a tuah ningcang zong kan ichap ngaingai hna. Ram le miphun caah nunnak pek in hrimnam kan itlaih ngam lo hmanh ah, NLD pawl bantuk tal in doh izuam ve hna usih.

"Kanmah Laimi hruainak in Korea ram ah Kawl ralkap cozah dohlangh tuahnak nawl a kan petu Pathian le Korea cozah cungah Laimi kan ilawmhnak kan chim cawk lo."

Nang le kei zong kan si khawh tawkte in Kawl ralkap cozah hi doh hna usih. Dimukresi le Human rights a um lonak ram ah cun saram a simi zu le va hmanh an ngam lai lo. Dam lonak in a khatmi nih zei tin dah kan miphun cu kan ṭanh khawh lai? Zingzan ei awk a ngei lomi nih zei tin dah kan ram kan ser khawh lai? A hmasa bik ah kan cozah aa thlen a hau.

Korea Times zong ah rel ding a um, ka'n.