Ka Duh Hau La’ng Kan Hawi Kan Kom

Salai Hehchetlawh

Saturday, November 1, 2008

Khukṭhi lenpi tluangthuk hlum hawi,
Kan in ngai riangmang hna parṭha.
Khuachin chuah zai nan rel lio i,
Chikkhat ca ti’n ṭian lainak ah,
Nan zaṭial kan in tlaih hna kha.
Hlan Pipu hna thisen rosung,
Lungrawn nan ruah ah lungkir in,
Nan ngai len lai pei nan lennak.
Langak rual hramuk phung toi in,
Nannih he hmel hmuh lainak caan,
Kan ruat tawn ee, ik lengmang in.

Laicin sempi khuachin hlum hawi,
Lungrawn khuami sempi rual maw,
Hawi hngar sual hna lai ti in,
Nan khuahngalh nih kan ram a ṭhanh.

Laicin sempi khuachin hlum hawi,
Nan phanh tluangdang Zauk toi ah,
Mirang catang sanghlei banh uh,
Khuaza mi nih phailen awk in,
Fimnak in kan ram run cuan te;
Chawva in kan ram run cuan te.

Laicin sempi khuachin hlum hawi,
Semnak lungrawn zalennak ca’h,
Na ha zawh in chimrel camcin,
Varang iroih kan ram caah,
Hramuk phung doh na phanh ram in.

Tinfim sempi Vakok rual hna,
Varang sin ah phuan izuam rih,
“Vakok covo Langak rual nih,
An chuhnak le an hrawhnak kong”
Vakok covo Langak, Awtaw,
Coter dingcu ṭhangthar rual ca’h,
Bihzun zak le rel ngam ti lo,
Vakok tuanbia si ai lai pei.

Tinfim sempi Vakok rual hna,
Langak doh ’sih fimnak hriam in.
Awtaw iap ’sih fimnak hriam in.
Vakok ngamh ’sih fimnak hriam in.
Kilhkamh cio ’sih Pipu rosung.

Laicin sempi khuachin hlum hawi,
Nikhatkhat cun dei te lai pei,
Zauk phung in kan ram te zong.
Khi ni zong ah Suttung Ṭingṭha,
Cerlian ni bang rung dir te law,
Certual lai ah na mipum in.