DC Lei Khuaruahhar Thil

A Ching ban ah "Vailamtah" aa suai.
Bawi Jesuh nih a tuarmi thirkhenhnak hmaneh

A Ching ban ah "Love" tiah aa ṭial.

A min: Chang Chue (A Ching)

A lai min: Far Sung Hniang

A chuahnak: Hakha

A holh thiammi: Hakha, Falam, English

A kum: 13 yrs

A cataang: 9th Grade

A umnak: Frederick, Maryland

A nu min: Biak Thluai (Kiakte)

A pa min: Ywe Han (Hakha Laansung ummi)

--- On Sun, 12/28/08, Salai Bawi Uk Thang wrote:

From: Salai Bawi Uk Thang
Subject: [Metkhuabo] Re: DC lei khuaruahhar thil a cangmi kong!
To: Metkhuabo@yahoogroups.com, "Laiforum@yahoogroups.com"
Date: Sunday, December 28, 2008, 10:33 PM

Hika zawnte hi hmet ulaw, hmanthlaak tlawmpal nan hmuh lai, cun adonghnak lei photo pawl khi video in zoh khawh mi an si i interview tuah pah i hngakchia pawl i an hal mi bia theitlei tete an um hna lai.

Hluanku pa

--- On Sun, 12/28/08, Vanthawng Cung wrote:
From: Vanthawng Cung
Subject: [Metkhuabo] DC lei khuaruahhar thil a cangmi kong!
To: laiforum@egroups. com, rungcin@yahoogroups .com, "me"
Date: Sunday, December 28, 2008, 11:53 PM

Laimi u le nau hna,

DC Lai hngakchia nute cung i a tlungmi thil kongkau ah Salai Bawi Uk Thang nih a vun ṭial len cang. Cun, a hmanthak zong a vun taar pah len cang. Theihtlei asi ve caah vun ṭial loin ka um kho lo. Tuzing tuan tein ka tho i kan umnak in 40 minutes hrawng asi mi an umnak hmun ah Pu Za Hnin Lian (Seihni Thang Cung nau pa) he kan vung kal. Suimilam pakhat tluk an nufa bia kan ruah hna. A nu, Kiakte hi keimah he Thantlang High School a rak kai ṭimi le hawikom ṭhing kan si caah i ngamhtlak ngaiin bia kan i ruah. Cu hnu ah zaanlei 3.00 p.m ah kan Biakinn (CBMC) ah i pum dingin kan upate nih an sawm hna caah mirangpa nih motor a vun khalh piak hna i a nufa an rung kan pumh pi. Cuvial chungin ka hmuhtonning tlawmpal zapi theih awk in hun chim ka duh.

A min: Chang Chue (A Ching)
A lai min: Far Sung Hniang
A chuahnak: Hakha
A holh thiammi: Hakha, Falam, English
A kum: 13 yrs
A cataang: 9th Grade
A umnak: Frederick, Maryland
A nu min: Biak Thluai (Kiakte)
A pa min: Ywe Han (Hakha Laansung ummi)

Biahalnak le bialehnak in ṭial ah a fian deuh ka zumh caah mahtining cun anu he, amah he bia an kan lehning in ka hun ṭial ko lai. Biahalnak hi 'Q', a nu bialehnak hi 'Anu', Aching bialehnak hi 'Amah' tiin ka hun hman lai. Cun, Aching hi mui dawhte, mifimte, mi duhnungte, mi ngote, mi nunnemte, mi titsa hninghno ngaimi te, mi holh tlawmte, mi ningzah pangte, hngakchia mui a keng ngai rih mite (innocent face) khi asi.

Q. Zeitik in dah mah ti a um hi aa thawkning?
Anu: Kan hnu lei August thla i Saya LiLian Camping a dongh lai zaan khan aa thawk.

Q. Mah cu zeitiset in dah asi ning asi?

Anu: Camping dong lai zaan ah amah tein Jesuh lemcang in a um i, kan inn ah na fanu mahti cun a um e, tiah an ka auh caah ka vung kal. Ka phak ah cun a rak dam cang. Amah zong piangpai ngaiin a rak um. Camping kai mi vialte tu cu kan sinah Jesuh a tak in aa langh an ti i, mitthli rual he an rak ṭap dih hna. Mahti lio ah cun amah cu a lung a fim lo an ti. Video le Camera in hmanthlak a timh len nain a hohmanh nih an thla kho lo. An Camera le an video vialte zeitin dik asi hnga, a rawk dih bantukin a um an ti.

Q. Jesuh a tak in aa langh na timi cu zeitindah aa langhning asi?

Anu: Amah cu a holh lo. A lung zong a fim lo. Nain, Jesuh vailamtahnak i a temhning te bak in a taksa in a langhter. Drama bantuk khi asi ko hen cu. A kephah pahnih aa chuah, a ban aa phar. A ke pahnih aa chuah mi cu patling pipi nih an ṭhial hnik len zongah a ngah lo.

Q. Zeitik in dah a kut cung i caṭial hi a langh?
Anu: A liam cia zarh hnih hrawng khan asi. Zingka ah kan tho i, ka nu ka kut hi zohhmanh amah tein ca aa ṭial a ka ti i, ka zo piak. Ka khuaruah a hartuk ve i Pu Than Kip Luai le kan krihfa upa pathum-li le a nute le pawl ka auh hna i an hung zoh cio.

Q. Zei tehna dah aa ttial?
Anu: A ṭialka ah cun a tambik cu 'I am coming soon' ti tehna, 'Tell the Gospel' ti tehna, I am real ti tehna, Peace ti tehna, Wisdom ti tehna an si bik. A tamtuk aa ṭial cang i kaa chinchiah cawk lo. Cun, a caṭial hi biatawi tete lawngte in a lang. Kan krihfa upa pawl nih cun a caan he a caṭial he an i chinchiah dih ko.

Mah chung vialte cu a nu he lawng bia kan i ruah hna. Kan fanute cu hmuh kan duh ko, ra kan auh piak ko tuah tiah a nu cu ka hal. Aih! kan nufa ningzak kan si. Hawi theihter hmanh hi kan duh lo fawh. Ka hawile nanmah sin lawngah fawh ka chim bia deuh asi a ti.
A fanu cu a vun auh i a rung ṭum. Hmaan kan thakpi. A kut cu kan zoh. Caṭial cu zeihmanh a um lo. A vun belte cu a car nawn khin a um. A kehlei kutbor (reekte) zawn i a cuangmi vailamtah pathum le a kutbor (keh le vorh) cung i a ummi thirkhenhnak neh belte cu an um. Anu nih "nute, na pu le an si hih, ṭha tein chawn hna" a hei ti i ngamh ngaiin a hei kan chawnh ve.

Q. Na kut caṭial cu a um ti lo maw, zeihmanh kan hmuh ṭung lo?
Amah: A duh caan paoh ah a chuak i a duh caan paoh ah a tlau.

Q. Mah caṭial a hung chuah lai cu na thei maw? A fah tah a faak maw? Zeiti khin dah na feel ning asi?

Amah: Ka theih ko. A thak pah. A fah zong a faak pah. A chim awk ka hngal ve lo.

Q. Na taksa dang ah tah zeizei a um maw?
Amah: Kan hnu zarh ah ka hnak a faak i mah zawnah cun a nakmi hmaneh a cuang. Mahka zawn cun a thi a chuak. A hmaneh cu a tu cu a lo. Nain, a duh caan ah a lang ṭhan. Cun, ka ke thir an khenhnak hmaneh zong a lang. Mah tu hi cu a thi tlawmte lawng a chuak.
Anu: Nizaan tihni ah khan a hawinu tiddim nute he chun ah lente an i celh lio ah eekinn ah a lut i a au i, ka vun zoh cu a kut cunglei thirkhenhnak hmaneh zawn in thisen a hung luang thiahmah ko. Zeiti awk ka hnga lo i, ka hnawh piak. Ka hnawh lio ah a hawinu te nih a kan naihtuk i, a thi dorte nih a tlak sual. A ai ciammam i a ṭap i, a pa sinah a tli.

Q. Ziah thisen dor tlak cu mahti cun na hawinu cu a ai hnga?
Amah: Keimah thisen asi lo. Pathian thisen asi. Pathian thisen cu hmuh khawh asi. Nain, tongh a ngah lo. Nan tongh ahcun aan kangh ko hna lai.

Q. Nute, zeiruang ah dah na kut ca aa ṭhial lai ah mi hmuh lo nak room maw, eek inn ah maw na zaam lengmang? Na nu nih hmuh a duh lo a zaam lengmang aan ti?
Amah: Pathian hmai cu hmuh a ngah lo. A hmu mi cu an mit a caw lai.

Q. Aa ṭial lio cu na hmu maw? Cafung in maw an ṭial, amah tein dah na thahri an hung puar?
Amah: A ṭialtu kut cu ka hmuh ko. Nain, voitam ka hmu ve lo. Room chung ka luh bak khin ka mit kaa au hlei ve ti lo.

Q. A caṭial cu mirang holh lawngte maw asi peng?
Amah: Aa ṭial ka ah cun Greek, Israel le Taluk holh in aa ṭial. Ka theih khawh lo caah thla ka cam i amah tein mirang holh ah aa thleng.

Q. A dang zeizei na hmuhmi le na theihnak a um maw?
Amah: Nangmah bantuk minung hi vawleicungah an chuak ti lai lo. Nangmah hi a donghnak na si. Atu ah cun mitlawmte lawng nih an in theih. Nain, hi hnu ah cun mitampi nih nangmah hi an in kawl lai i hmuh an in duh lai an ka ti.

Suimilam pakhat hrawng kan ṭhut hnu ah 'ṭin cang kun usih' kan vun ti ah khin room chungah a vung tli ta i a hung chuak ṭhan colh. A hung chuah cun a kehlei kut ah caṭial cu a hung lang. A caṭial cu duhsah tete in a hung fiang chin thluahmah. A hnu ah cun catlap cung i ṭial mi tluk tein rel khawh asi. Aa ṭial mi cu " TELL THE GOOD NEWS" ti asi. Kan khuaruah a hartuk ve i hman kan thlak cikcek hnu ah kan ṭin.

Khah, hi vial in si rih seh. Nan rel cawk lai lo. Chim cawk ding zong asi lo. Ka chim lomi a tampi rih.

Damte cio in,

Van T Cung
Maryland, USA