Lai Nuhrin Vo Kheltu Pawl Le UNHCR An I Tong

February thla ni 10 ni ah khan nuhrinvo (human rights) kheltu pawl cu UNHCR nih an auh hna i suimilam pakhat le cheu chung itonnak an ngei. UNHCR cu Korea ah cun zei hmanh a si lo nain ralzam pawl hi a si khawh chung in a bawmh hna. Anmah ruang ah Korea cozah ralzam phungphai zong aa thleng ngaingai. Mah an i ton hnawhchan cu ‘Korea ram um Laimi pawl i nan sining hi hun kan chim ulaw a cunglei ah kan kaipi lai’ ti khi a si. Laimi zong nih cun anmah le an harning cio tete cu an chimh hna. Korea ah ralzam a sokmi hi nikhat hnu nikhat in an karh chin thluahmah. November 30, 2008 tiang ah hin 2,133 an si cang. Hi chung ah hin Laimi hi 60 fai itel dawh an si. Korea ram ah Laimi hi 160 fai kan um.

Ram min	A sokmi a zat	Ralzam cohlanmi a zat
Nepal	375	0
China	319	5
Myanmar	208	42
Nigeria	163	0
Uganda	147	1
D.R. of Congo	85	13
Bangladesh	88	19
Ethiopia	59	7
Iran	44	3
A dangdang	572	8
A zat	2,133	101

Korea cozah nih hin ralzam pawl i an nuhrinvo hi a tuakpiak set hna lo. A duh can paoh thong ah a thlak hna. Iran pa hoihna cu kumthum chung bak te thong ah an chiah. Ralzam thongtla lak ah a sau bik a tlami a si. UNHCR zong nih, “A herh tuk lo ah cun ralzam pawl hi thong thlak ding an si lo. An thlak hna hmanh ah a caan an khiahpiak hna ding a si” a ti. “Korea cozah nih hin mivakvai phungphai le ralzam phungphai hi an danter ding a si. Hi hna pahnih hi an sining aa dang tuk” tiah a bet. US nih cun Ralzam le dornak a sokmi pawl hi thlaruk chung lawng thong a thlak hna. Cu hmanh cu an kong ceih a duh caah a si.