Korea ah Lai Phunpi Ni Khemping An Tuah

Korea ram ah an dirhmi Chin Democracy and Human Rights Network (CDHRN) hruainak in Lai Phunpi Ni Khemping cu February 22 ni, zing suimilam 11 in 12 tiang Seoul Khualipi ah a ummi Kawl Palai zung hmai ah an tuah. Minung pariat an si. “Lai Phunpi Ni hi Laimi caah sullam a ngeimi ni a si i Kawl ralkap cozah nih “Chin State Day” tiah a thlen” ti in CDHRN nih press release ah a ṭial. “Nihin kan dohlanghnak tuah cu ka lung a hmuai ngai te. Laimi lawng te kan si. Lai holh in dohlanghnak hi keimah lila hmanh nih voikhat te hmanh ka tuah bal lo. Kawl holh ṭheo hi ka hman tawn. Nihin cu Lai holh bak in Pa Duh Tling Mang le Pi Sung Hnem nih Kawl ralkap cozah cu an duhning le an ruahning te bak in an au hnawh hna i Laimi nih zohchunh tlak bak an si. Hmailei zong ah hi bantuk tete hi um kho peng sehlaw a ṭha hnga. Laimi nih Meithal tlaih in Kawl ralkap cozah kan doh hna pinah Kawl pawl bantuk zong in dohlanghnak kan tuah kho ṭhiamṭhiam” tiah CDHRN Coordinator pakhat a simi Ni Chum Er nih a chim. Cu khemping ah cun CDHRN nih Kawl ralkap cozah a halmi cu ‘a rannak in nuhrinvo buar le biaknaklei namnehnak ngol zokzok ding le Lai Phunpi Ni sullam ngeihter ṭhan ding’ ti tehna a hal. Chin Democracy and Human Rights Network hi ram le miphun a dawtu pawl July 6, 2008 ah khan meṭing an ṭhu i July 13 ni ah Kawl ralkap Palai zung hmai ah Salai Tin Maung Oo philhlonak ah tiin dohlanghnak zong a rak tuah bal cang. September 21, 2008 ah Komiṭi ṭhate in dirhmi a si. Member zong an karh chin thluahmah.